👉🏻છેલ્લા છ વર્ષમા સુરતમાં ૩૪ અને તાપી જિલ્લામાં ૯ રિકન્સ્ટ્રકટીવ સર્જરી કરી રક્તપિત્ત દર્દીઓની વિકૃતિ દૂર કરવામાં આવી,,,👉🏻રાજ્ય સરકારના પ્રયાસોથી અસાધ્ય માનવાનામાં આવતાં રક્તપિતની સારવાર હવે સરળ-સુલભ બની છે,,,👉🏻વર્ષ ૨૦૧૬ થી ૨૦૨૨ દરમિયાન સુરત-તાપી જિલ્લાના રક્તપિતગ્રસ્તો તેમજ રક્તપિતના કારણે પગમાં બધિરતા ધરાવતાં કુલ ૮,૩૬૮ દર્દીઓને માઈક્રોસેલ્યુલર રબર (MCR) પગરખા પૂરા પાડવામાં આવ્યાં,,,👉🏻સુરત-તાપી જિલ્લામાં 'સ્પર્શ લેપ્રસી અવેરનેસ કેમ્પેઈન પખવાડિયા' અંતર્ગત રક્તપિત જનજાગૃતિ અભિયાન,,,

----------------------------------------------

સુરત,:-(સુરત પ્રતિનિધી):-તા:૩૦ જાનેવારી-સોમવાર:--વિશ્વમાં દર વર્ષે તા.૩૦ જાન્યુ.ને 'રક્તપિત દિવસ' તરીકે ઉજવવામાં આવે છે. રક્તપિત રોગને લઈને લોકોમાં જાગૃત્તિ વધે અને તેને રોકવા માટેના સહિયારા પ્રયાસો હાથ ધરી શકાય તે હેતુથી સુરત અને તાપી જિલ્લામાં તા.૩૦ જાન્યુ.-થી ૧૩મી ફેબ્રુ.-૨૦૨૩ દરમિયાન 'સ્પર્શ લેપ્રસી અવેરનેસ કેમ્પેઈન પખવાડિયા' અંતર્ગત રક્તપિત જનજાગૃતિ અભિયાનની શરૂઆત કરવામાં આવી છે. રાજ્યના ૧૨ હાઈએન્ડેમિક જિલ્લાઓમાં વર્ચ્યુઅલ ગ્રામસભાના માધ્યમથી આ અભિયાનનો પ્રારંભ કરાયો છે. સુરત નવી સિવિલ કેમ્પસમાં આવેલી ડિસ્ટ્રિક્ટ લેપ્રસી ઓફિસ દ્વારા 'રક્તપિત દિવસ'ની ઉજવણી રક્તપિત્તના દર્દીઓ સાથે કરી રક્તપિત્ત નાબૂદીના શપથ લેવામાં નો સંદેશ આપવામાં આવ્યો હતો. 

     પબ્લિક હેલ્થ ઓફિસર અને સુરત ડિસ્ટ્રિક્ટ લેપ્રસી ઓફિસરશ્રી ડો.જિજ્ઞેશ પટેલે જણાવ્યું હતું કે, સુરત જિલ્લામાં રક્તપિત રોગનો પ્રમાણદર ૧૦,૦૦૦ ની વસ્તીએ ૦.૪૮ અને તાપી  જિલ્લામાં ૧૦,૦૦૦ ની વસ્તીએ ૧.૩૦ છે. જ્યારે ગુજરાત રાજ્યનો રક્તપિત રોગનો પ્રમાણદર  ૧૦,૦૦૦ ની વસ્તીએ ૦.૩૩ છે. રાજ્યના ૧૨ હાઈએન્ડેમિક જિલ્લાઓમાં રોગનું પ્રમાણદર ૧ ટકા કરતા વધુ હોવાથી ક્રમશ: ડિસે.-૨૦૨૨ ના અંત સુધીમાં વડોદરા, પંચમહાલ, નર્મદા, છોટાઉદેપુર, મહિસાગર, સુરત, વલસાડ એમ ૬ હાઈએન્ડેમિક જિલ્લાઓમાં રોગનું પ્રમાણદર ૧ ટકા કરતા નીચે લાવી એલિમિનેશનનું ધ્યેય હાંસલ કરવામાં સફળતા મળી રહી છે. 

      આ અગાઉ રક્તપિત્તને અસાધ્ય રોગ માનવામાં આવતો હતો, પરંતુ હવે તેનું નિદાન અને સારવાર સરળ બની છે. કેટલાક લોકો માને છે કે, આ રોગ સ્પર્શ કરવાથી ફેલાય છે. જોકે આ માન્યતા તદ્દન ખોટી છે. રક્તપિત સ્પર્શ કરવાથી ફેલાતો નથી. સંક્રામક રોગ હોવા છતાં પણ સ્પર્શ કરવાથી, હાથ મિલાવવાથી, સાથે ઉઠાવા-બેસવાથી ફેલાતો નથી એમ ડો.જિજ્ઞેશ જણાવે છે. 

      ડો.પટેલે જણાવ્યું કે, સુરત અને તાપી જિલ્લામાં છેલ્લા છ વર્ષમા અનુક્રમે ૩૪ અને ૯ જેટલી રિકન્સ્ટ્રકટીવ સર્જરી કરી દર્દીઓની વિકૃતિ દૂર કરવામાં આવી છે. સુરત અને તાપી જિલ્લામા વર્ષ ૨૦૧૬-૧૭ થી ૨૦૨૨-૨૩ (ડિસે.૨૦૨૨ અંતિત) સુધીમાં અનુક્રમે રક્તપિતના કારણે પગમાં બધિરતા ધરાવતાં કુલ-૫૬૫૮ અને ૨૭૧૦ રક્તપિતગ્રસ્તો મળી કુલ ૮,૩૬૮ દર્દીઓને માઈક્રો સેલ્યુલર રબર પગરખાં (એમ.સી.આર.) પૂરા પાડ્યા છે. જેના કારણે પગમાં બધિરતા ધરાવતાં રક્તપિતગ્રસ્તોને પગમાં ન રૂઝાય તેવા ચાંદા (અલ્સર)થી બચાવી શકાયા છે.                

     નોંધનીય છે કે, રાજ્ય સરકારના આરોગ્ય વિભાગ દ્વારા વર્ષોથી રક્તપિતને નાથવા માટે અનેકવિધ પગલા હાથ ધરવામાં આવ્યા છે. કોરોનાકાળની વચ્ચે વર્ષ ૨૦૨૦ થી '૨૩ દરમ્યાન રક્તપિતના વણશોધાયેલ દર્દીઓ શોધવા એક્ટિવ કેસ ડિટેકશન એન્ડ રેગ્યુલર સર્વે, સ્પર્શ લેપ્રસી અવેરનેસ કેમ્પેઈન, હાર્ડ ટુ રિચ એરિયા કેમ્પેઈન જેવી ખાસ ઝુંબેશ હાથ ધરવામાં આવી. જેમાં જનરલ હેલ્થ સ્ટાફ અને આશાની ટીમો દ્વારા ડોર ટુ ડોર તપાસ કરી રક્તપિતના નવા દર્દી શોધીને ત્વરિત બહુઔષધીય સારવાર આપી રોગમુક્ત કરવામાં આવ્યાં છે. 

*આવો જાણીએ રક્તપિત શું છે?*

    રક્તપિત માઈક્રોબેકટેરીયમ લેપ્રસી નામના સૂક્ષ્મ જીવાણુંથી થતો રોગ છે. આ રોગમાં શરીરની ચામડી અને જ્ઞાનતંતુઓને અસર થાય છે. આ રોગ કોઈપણ ઉમરે સ્ત્રી અથવા પુરૂષ એમ બંને જાતિને થઈ શકે છે. સમયસર સારવાર ન કરવામાં આવે તો એક વ્યક્તિથી બીજી વ્યક્તિને શ્વાસોશ્વાસ મારફતે ચેપ લાગી શકે છે. વહેલુ નિદાન અને નિયમિત બહુઅઔષધિય સારવારથી રક્તપિત રોગનો ફેલાવો અને રોગને લીધે આવતી વિકૃતિ /અપંગતા અટકાવી શકાય છે. રક્તપિત રોગના લક્ષણોમાં (૧) શરીરના કોઈપણ ભાગમાં આછું, ઝાંખુ, રતાશ પડતું સંવેદના વિનાનું ચાઠું તેમજ (૨) જ્ઞાનતંતુઓ જાડા થવા તેમજ તેમા દુ:ખાવો થવો એ મુખ્ય છે.

*રક્તપિતના દર્દીને સારવાર કયાંથી મળે?*

     રક્તપિત કોઈપણ તબક્કે સંપૂર્ણપણે મટી શકે છે. નજીકના તમામ સરકારી દવાખાના, સબસેન્ટર પ્રાથમિક આરોગ્ય કેન્દ્ર, સામુહિક આરોગ્ય કેન્દ્ર, રેફરલ હોસ્પિટલ, ડિસ્ટ્ર્રીકટ જનરલ હોસ્પિટલ ખાતે એમ.ડી.ટી. મલ્ટી ડ્રગ ટ્રીટમેન્ટ સારવાર વિનામૂલ્યે ઉપલબ્ધ છે, જેનો લાભ લઈને રક્તપિત્તનું ઉત્તમ નિદાન અને ઘનિષ્ઠ સારવાર મેળવી શકાય છે. 

*(ખાસ લેખ: પરેશ ટાપણીયા)*

-૦૦-(સૌ.સુરત માહીતી ખાતુ)